ಸುನಾಮಿ

ಸಾಗರದ ಅಲೆಗಳ ಏರಿಬಂದ
ಸಾವಿನ ಸರದಾರ
ಸಾವಿರ ಜನಗಳ ತುಂಬಿದ ಬದುಕಿಗೆ
ತಂದ ಸಂಚಕಾರ
ದೈತ್ಯ! ನಿನ್ನ ಅಟ್ಟಹಾಸಕ್ಕೆ ಸಿಕ್ಕಿ
ಕೊಚ್ಚಿದವೆಷ್ಟೋ ಆಸ್ತಿ-ಪಾಸ್ತಿ
ಸಿಗಲೇ ಇಲ್ಲ ಕೊನೆಗೂ
ಬಲಿಯಾದವರ ಅಸ್ತಿ
ಹೊಟ್ಟೆಯಕೂಸು ಕೈಬಿಟ್ಟುಹೋದ
ತಾಯಿಯ ದುಃಖದ ಕಂಬನ
ನೀ ಕೊಂದ ತಾಯಿಗಾಗಿ
ಆ ಕಂದನ ಹಂಬಲನ
ಬಂಧು-ಬಳಗ ಕಳೆದು ಕೊಂಡವರ
ಮುಗಿಲು ಮುಟ್ಟುವ ಆಕ್ರಂದನ
ಚುರ್ರೆನಿಸುವುದು ಕರುಳು
ತುಂಬಿಬರುವುದು ನಯನ
ಸುಂದರ ಬದುಕುಗಳ ಕೊಚ್ಚಿ
ಮಾಡಿದೇ ನೀ ಬೇನಾಮಿ
ಬರೀ ಅಲೆಯಲ್ಲ ಮೃತ್ಯುಬಲೆ
ಮಹಾಮಾರಿ ನೀ ಸುನಾಮಿ